على مسؤوليتي" مع الوزير د. سليم الصايغ
"صوت لبنان – صوت الحرية والكرامة
01-01-2012
اليوم بداية جديدة لسنة جديدة...
ومتل العادي ما منذكر من التاريخ إلا أحداثو...
المآسي البشرية والطبيعية، من زلازل وفيضانات وحروب،
والتحولات السياسية والإقتصادية والإجتماعية، من أزمات وإنهيارات وثورات...
وهيك ما منذكر إلا اللي منو ماشي حالو...
وقليل كثير قليل منحكي عا اللي ماشي حالو...
كإنا محكومين إنو نكون أسرى الحدث،
نضل رهائن للياس والقرف،
حياتنا وأحلامنا ملك تجار الحقيقة، وسماسرة السايسة، ومأجوري الإعلام، وثقافة الدهشة، واللمعة والسرعة...
هل يا ترى بدنا نضل هيك؟ أسرى؟ رهائن؟ محكومين؟ مظلومين؟ ناطرين؟
الجواب عطاه اللبناني مبارح، بالسهرة الكبيرة اللي اللي صارت بالعايد،
هيي اللي بينت انو التاريخ، التاريخ الحقيقي للبنان، هوي مش الأخبار اللي بتصنعوا، يعني مش الحدث.
التاريخ الحقيقي هوي اللي بيعملو اناس الصغار...هني اللي كسروا حلقة الغباء والخوف اللي جربوا يحطوهن فيها، وراحوا عّيدو، ببيتن عيّدو، بالمطعم، بالملهى، بالمشرب والمأكل والملبس عيّدو،
أي نعم هودي الناس الصغار أعطوا درس لكل الكبار،قالولن: غصب عنكم، نحنا بدنا نعيش.
هودي ما سمعوا للأخبار، ولا لتحليل الوزير، ولا للسجال بين الوزير والوزير،
وما صدقوا المسؤل، هودي تركو المرجع يحكي لوحدو، لأنن ناس قدروا أنو بدن ينبسطو، وبيحقلن ينبسطو، فرحن حق، وهني بيستاهلو،
اللي سهروا مبارح هني ناس صغار تعبوا، اشتغلوا، درسوا، فلحوا، واليوم عم يفرحو..
الفرح عندن عيد، وبالعيد م يكتبو التاريخ الحقيقي،
حابب قول لكل واحد من اللي سهرو مبارح بفرح:
مثل ما انت عم تكتب التاريخ اللي منو بالكتب،
انت ذاتك اللي رح تكتب بكرا التاريخ اللي رح يصير بالكتب،
لأنك رح تنتصر، بالفرح رح تنتصر، بالحرية رح تنتصر، بالمحبر رح تنتصر...
رح تنتصر على الجاهلية بالانفتاح والحوار، وعلى الاستقواء والإستعلاء بالتواضع، والبساطة، وعلى الصراخ والعويل بالهدوء والكلمة الحلوة،
وعلى الاهانة بالابتسامة المتسامحة،
وعلى الانحطاط بالترقي والسمو والارتقاء.
انت اللي عرفت قبل غيرك، انو الزمن الآتي...
هوي زمن الحرية...
زمن الفرح...
زمن المحبة...
زمن الحدث الحقيقي...
انت اللي عن بطمن وبتقول انو:
عنا الانسان رجع يصير شعب،
والشعب يصير حقيقة،
والحقيقة هالمرة اكثر من كل مرة رح تكتب بكل بساطة تاريخ البلد الحلو بأرضو، بشعبو، بإنسانو...
كل عام وإنتو بخير.
سليم الصايغ
____________________
